Namanganda tadbirkorlik faoliyatini rivojlantirishda tijorat banklari bilan hamkorlikning amaliy natijalariga bag‘ishlangan seminar bo‘lib o‘tdi.

O‘zbekiston Savdo-sanoat palatasi Namangan viloyati hududiy boshqarmasi tashabbusi bilan tashkil etilgan tadbirda O‘zbekiston Respublikasi Markaziy banki viloyat bosh boshqarmasi, respublika tijorat banklarining viloyat filiallari rahbarlari hamda ommaviy axborot vositalari xodimlari ishtirok etdi.

Prezidentimiz rahnamoligida kichik biznes va xususiy tadbirkorlikni rivojlantirish, import o‘rnini bosuvchi va eksportbop mahsulotlar ishlab chiqarishni qo‘llab-quvvatlashga qaratilayotgan alohida e’tibor yuksak samaralar berayotgani ta’kidlandi. Tadbirkorlik subyektlarining rivojlanishida tijorat banklarining moliyaviy ko‘magi katta ahamiyat kasb etmoqda.

– “O‘zsanoatqurilishbank” aksiyadorlik tijorat bankining Namangan viloyati bo‘limidan olingan 100 million so‘mlik kredit mablag‘i ishlab chiqarishni kengaytirishimizda juda qo‘l keldi, – deydi “Namangan porloq ta’mirlash servis” mas’uliyati cheklangan jamiyati mas’ul xodimi Abdusamad Mavlonov. – Korxonamizda ilgari xorijdan keltirilgan shpatlyovka, gruntovka, emulsiya, bo‘yoq singari import o‘rnini bosuvchi qurilish-ta’mirlash ashyolari ishlab chiqariladi. Davlatimiz tomonidan yaratilayotgan keng imkoniyatlar tufayli ishlab chiqarish hajmi tobora ortmoqda. 2012-yilda 560 million so‘mlik mahsulot ishlab chiqargan bo‘lsak, 2014-yilda bu ko‘rsatkich 2 milliard so‘mdan oshdi. 2015-yilda bank krediti ko‘magi bilan tayyorlanayotgan mahsulotlarni qadoqlash uchun polietilen idishlar ishlab chiqaruvchi texnologiya keltirishni rejalashtirganmiz.

Seminarda ishlab chiqarish jarayoniga zamonaviy minitexnologiyalarni joriy etish, tijorat takliflarini olish va elektron shartnomalar tuzish bo‘yicha fikr almashildi.

Tadbir doirasida tashkil etilgan sanoat ko‘rgazmasida ilg‘or texnologiyalar asosida tikuvchilik va trikotaj mahsulotlari ishlab chiqarayotgan “Aisha Home Textile”, “Nafis tex group”, “Bosser textile servis”, “Osiyo kiyim sanoat” kabi korxonalar mahsulotlari namoyish etildi.

  Ma'lumot manbai: uza.uz