Namangan porloq ta’mirlash servis” mas’uliyati cheklangan jamiyati   ichki bozorni import o’rnini bosuvchi qurilish ashyolari  bilan ta’minlashda faol qatnashayotgan kichik biznes sub’ektlaridan biri.  Bu yerda ishlab chiqarilayotgan lok bo’yoq, shuningdek,  binolar pardozi uchun mo’ljallangan boshqa  mahsulotlar  yuqori sifati bilan ajralib turadi.

 Shu boisdan ham  xorijiy texnologiya asosida tayyorlanayotgan mazkur mahsulotlarga  binokorlik tashkilotlarining qiziqishi tobora ortib bormoqda. Xususan, qishloqlarda namunaviy loyiha asosida tiklanayotgan turar joylarni pardozdan chiqarishda korxonaning  tashqi ta’sirga chidamli, uzoq vaqt rangini saqlab turuvchi yorqin bo’yoqlaridan keng foydalanilayotir. Keyingi paytlarda bu yerda eshik va romlarga yarqiroq tus beruvchi   maxsus lok, bo’yoqlarni suyultirishda ishlatiladigan modda,  binolar old qismiga mo’ljallangan oq rangdagi shpatlevka mahsulotlarini tayyorlash o’zlashtirildi.

Ta’kidlash lozimki, korxonada talab va taklif mutanosibligini ta’minlash borasidagi intilishlarga mos ravishda ishlab  chiqarish xajmi muttasil ortyapti. Chunonchi, o’tgan yilning shu davrida har oyda 150 million so’mlik miqdorda qurilish ashyolari tayyorlangan bo’lsa ayni paytga kelib bu ko’rsatkich 270 million so’mlikdan ko’proq bo’lyapti. Yoki joriy yilning olti oyi davomida iste’molchilarga 1,5 milliard so’mlikdan ziyod pardozbop qurilish ashyolari yetkazib berildi.

http://namangan.uz/index.php/uz/yangiliklar/414-yuqori-sifatli-qurilish-ashyolari